«Мәңгілік Ел» салтанат қақпасы Қазақстан Республикасының Тұңғыш Президенті - Нұрсұлтан Әбішұлы Назарбаевтың бастамасымен 2011 жылдың 16 желтоқсанында ашылды. Салтанатты қақпаның биіктігі 20 м. Құрайды және ол Қазақстан Тәуелсіздігінің 20 жылдығын білдіреді.

Сәулетшісі: Сағандық Смайылұлы Жамбулатов. Мүсіншілер: Мұрат Мансұров және Нұрлан Далбаев.

Салтанат қақпасының тұғырларында тауашалар бар. Бұл тауашаларда қазақ ұлтының менталитетін бейнелейтін нышандары бар бедерлі құрылымдар орналасқан.

Салтанат қақпасы аралығының сол жағында даналықтың, руханият пен халықтың ой-санасының символы - ақсақалдың мүсіні орнатылған. Салтанат қақпасы аралығының оң жағында отбасы ошағының қорғаушысы - Әйел Ананың бедерлі мүсіні орналасқан. Қазақтар үшін қасиетті «Ана» бейнесінде Отанға, анаға деген махаббатпен байланысты «Отан Ана», «Жер Ана», «Ана тілі» сияқты ұлттық құндылықтар өрілген.

Әр мүсіннің астында қазақтың әйгілі күн белгісі – «Мәңгілік» орналасқан. Бұл мемлекеттің мәңгілік екенін көрсетеді. Түркі халықтарында күн белгісінің бейнесі барлық жағымсыздан сақтайтын тұмар ретінде қызмет етті және жарық, жылу, өмір және жақсылық көзі болды.

Алдыңғы бөлігінің жоғарғы жағында «Мәңгілік Ел» деген жазу орналасқан. Түркі жылнамаларында «Мәңгі» (мәңгілік) сөзі көбінесе «Тәңір», «Құдай», «Аллаһ» сөздерімен қатар қолданылады. Бұл ұғымда «Мәңгілік ел» «Ел, құдіретті халық» дегенді білдіреді.

Тауашаның сол жағында қазақ батырларының ерліктері мен батырлықтарын бейнелейтін ежелгі көшпенді жауынгердің мүсіні орналасқан. Оң жақтағы тауашада мемлекеттің болашаққа деген ұмтылысын сенімді қорғаумен бейнелейтін заманауи жауынгердің мүсіні орналасқан.

Салтанат қақпасының бүйір бөліктерінде «Тай-қазан» символикалық мүсіндері орналасқан ерекше тауашалар бар. Түркі халықтары үшін «Тай-қазан» - ынтымақ, қонақжайлылық пен молшылықты білдіретін терең мағынаға ие.

Сондай-ақ, бүйір қабырғалары күрделі қазақ ою-өрнектерімен безендірілген, онда жоғарғы бөлігінің ортасында қазақ жауынгерлерінің қорғаныс құралы «Қалқан» орналасқан. Қалқан барлық уақытта қауіп-қатерден қорғауды, сенімділікті, табандылықты және жеңісті бейнелейді.

Ішінде екі жағынан арка саңылауы бедерлі панельдермен безендірілген. Олардың бірінің сюжеттік желісі қазақ ұлты тарихының дамуын көрсетеді. Екінші жағынан панно тақырыбы ұлттың басты құндылығы – Тәуелсіздікке арналған.